የጥንካሬ ጉዞ – ዶ/ር መንበረ አክሊሉ

 

Image result for ዶ/ር መንበረ አክሊሉ

 

በህይወታችን በአንድ ወይም በሌላ አጋጣሚ በመንታ መንገዶች ላይ ቆመን አንዱን እንድንመርጥ ተገደናል፡፡ እናም አብዛኞቻችን ግብዞች ነንና ሌላ አማራጭ የሌለ ይመስል ብዙሀን የመረጡትን መንገድ አይናችንን ሳናሽ ተከትለናል፡፡ ለምን? እነዚያ መንገዶች ወደየት እንዴት እንደሚያደርሱ በትክክል ይታወቃላ፡፡ ለማን ብለን አዳዲስ እንቅፋቶችንና አደጋዎችን በራሳችን ላይ እንጋብዛለን? በተጠረገ መንገድ መሄድ ደግሞ ጀግንነት አይጠይቅምና ገድሎችና የሕይወት ቁምነገሮች ከተቃራኒው መንገድ ብቻ ይገኛሉ ብዬ አፌን ሞልቼ መናገር እችላለሁ፡፡ በዚህኛው መንገድ እኮ ሌላው ይቅርና ማን እንደሚቀብርህ ሁሉ መገመት ትችላለህ፡፡ እናም ዛሬ ትንሽ ገድልና ትንሽ ቁምነገር እንድንሽት ትንሽ እንኳ ብርታት ይሰጠን እንደሆን የተቃራኒው መንገድ አንድ ታሪክ ይዤላችሁ መጣሁ፡፡

 

ባለታሪካችን እ.አ.አ. የ2014 አ.ም. የካሊፎርኒያው ሆሊ ኔምስ ዩኒቨርሲቲ የክብር ዶክትሬት ተሸላሚ ለመሆን የበቁ የጎጃም ተወላጅ ናቸው፡፡ ዶ/ር መንበረ አክሊሉ ይባላሉ፡፡ አባታቸውን ፈጽሞ አያውቁም፡፡ ትምህርት ያልቀመሱ እናታቸው ከሻይ ቤት ጀምረው ባሳደጉት ሆቴላቸው ገቢ ነው አባትም እናትም ሆነው ከነወንድም እህቶቻቸው ያሳደጓቸው፡፡ ሆኖም የኋላ የኋላ ይኸው የሆቴል ንግድ ወላጅ እናታቸውን እንዳሳጣቸው ዶ/ር መንበረ ይናገራሉ፡፡ በአንዲት በተረገመች የፋሲካ በአል ምሽት ከደንበኛ ጋር በተፈጠረ አምባጓሮ የተተኮሰች ጥይት ሰለባ ህይወታቸውን አጡ፡፡ ከሁሉ የሚያስከፋው ይህ ሁሉ ትዕይንት የ11 አመቷ መንበረ በነበረችበት መካሄዱ ነው፡፡ መቼም አይደለም ለ11 አመት ልጅ ለአዋቂም ቢሆን ይህ ምን ያህል ከባድ እንደሆነ ነጋሪ አያሻውም፡፡ ከዚያ በኋላ የታላቅ እህታቸው ሀላፊነት ሆነው በደብረማርቆስ ንጉስ ተክለሀይማኖት ትምህርት ቤት የመጀመሪያ ደረጃ ትምህርታቸውን ተከታተሉ፡፡ በቀጣይም በወቅቱ አዲስ አበባ ኗሪ የነበረው ወንድማቸው ዘንድ ተጠግተው በዳግማዊ ምኒልክ የሁለተኛ ደረጃ ትምህርታቸውን አጠናቀቁ፡፡

 

ምን እየገመታችሁ እንደሆነ አውቃለሁ፡፡ ከዚያም በዚህ በዚህ ዩኒቨርሲቲ የከፍተኛ ትምህርታቸውን ተከታትለው፤ አጥጋቢ ውጤት በማምጣት ፤ ያጋጠማቸውን የውጪ የትምህርት እድል በመጠቀም ምናምን አይደለ? የለም፡፡ የሁለተኛ ደረጃ ትምህርታቸውን ከጨረሱ በኋላ ሁላችን እንደገመትነው የከፍተኛ ትምህርትን አልተቀላቀሉም፡፡ ይልቁኑም ከቤተሰባቸው የደረሰባቸውን ግፊት በመቋቋም የትወና ሙያ ማሰልጠኛ ውስጥ ትምህርት ጀመሩ እንጂ፡፡ ከዚያም በተለያዩ የቴሌቪዥን ድራማዎችና ቲያትሮች ላይ በመሳተፍ ተዋናይት የመሆን ህልማቸውን ለማሳካት ቻሉ፡፡ በዚያም አላቆሙም ወደጣሊያን ሀገር በመሻገር አለም አቀፍ ተዋናይት ለመሆን ጉዞዋቸውን “ሀ” ብለው ጀመሩ፡፡

 

በጣሊያን ሀገር ግን የጠበቁትን የትወና ሙያ ስኬት ሳይሆን የትዳር ህይወትን ለማግኘት ቻሉ፡፡ ትዳር የተቀደሰ ግንኙነት ነውና ቤተሰብም የማንኮንንበት የራስ አለም ነውና ዶ/ር መንበረ በሁኔታው ቅር አልተሰኙበትም፡፡ ሆኖም ከጊዜያት በኋላ ነገሩ የተገላቢጦሽ ሆኖ የጠበቁት የሞቀ ትዳር የእሳት ወላፈን ሆኖ መልሶ ይለበልባቸው ጀመር፡፡ የትዳር አጋራቸው በውሀ ቀጠነ ዘወትር አካላዊ፣ ስነ ልቦናዊ ብሎም ወሲባዊ ጥቃቶችን ያደርሱባቸው ነበረና፡፡ ስለአምባገነን የትዳር አጋሮች አንድ እውነታ አለ፡፡ አይደለም ስለረቂቅ የባለቤታቸው ስሜት በሁሉ ዘንድ ሊታይ ስለሚችለው የሰውነት ክፍል እንኳ አይጨነቁም፡፡ ጥቃት የሚያደርሱበት አንድ አሳማኝ ምክንያት እንኳ ስለሌላቸው በምንም መንገድ የሚመጣውን መከላከል አይቻልም፡፡ በየትኛውም መልኩ ለሚያደርሱት ጥቃት ውስጥ ማሳየት የሚፈልጉት አንድ ነገር ብቻ ነው፡- የበላይነታቸውን፡፡ ታዲያ እንዲህ ካለ ሰው ጋር እንዴት ይዘለቃል? የሚገርመው ዶ/ር መንበረ ነፍሰ ጡር እያሉ እንኳ የሚደርስባቸው ጥቃት ምንም ታህል አለመቀነሱ ነው፡፡ እናም የ9 ወር እርጉዝ እያሉ ለራሳቸውም ሆነ ገና ላልተወለደ ልጃቸው ህይወት በመፍራት ተስፋ ያደረጉበትን ትዳር ወደኋላ ጥለው ወጡ፡፡ እናት ለመሆን ቀናት ሲቀራቸውም በሰው ሀገር መጠጊያ አልባ ነበሩ፡፡

 

ዶ/ር መንበረን በአንዲት ቤተክርስቲያን ውስጥ አግኝተው በሁኔታቸው ያዘኑት የሀይማኖት አባት አማካኝነት በተቀላቀሉት ማዘር ቴሬሳ የሴቶች መጠለያ ውስጥም በሰላም ተገላገሉ፡፡ ለሁለት ወራት ያህል በመጠለያው ከቆዩ በኋላ በአካልም በመንፈስም ታድሰው ነበርና ልጃቸውንና ራሳቸውን ማቋቋም አላቃታቸውም፡፡ በተለያዩ ቦታዎች እየሰሩ ክርስቲያን የተባለ ወንድ ልጃቸውን ለማስተማርና ለማሳደግ በቁ፡፡ እ.አ.አ. 1995 ዓ.ም. ማለትም ክርስቲያን የመጀመሪያ ደረጃ ትምህርቱን ሲጨርስ የጣሊያን ምድርን ለቀው ወደ አሜሪካ ለመሄድ መወሰናቸውን ለወዳጆቻቸው አስታወቁ፡፡ በእውነቱ ይኸንን አቋማቸውን ማንም አልወደደላቸውም ነበር፡፡ ወዳጆቻቸው በብዙ ችግር የገነቡትን ህይወት በሌላ ሀገር ድጋሚ መጀመር ሞኝነት ነው ሲሉ ልጃቸው ደግሞ የሚያውቀውንና የተወለደበትን ቦታ መልቀቅ አልፈለገምና በበኩሉ ተቃወማቸው፡፡ የዶ/ር መንበረን ሀሳብ ግን ሁለቱም ሊያስቀይሩ አልቻሉምና እ.አ.አ በ1995 አ.ም. ወደ አሜሪካ ተጓዙ፡፡

 

የአሜሪካ ምድርን ከረገጡ በኋላ በጣሊያንኛ ቋንቋ ችሎታቸው በመጠቀም ብዙም ሳይቸገሩ በአንድ የጣሊያን ሬስቶራንት ውስጥ የእንግዳ ተቀባይነት ስራ ለማግኘት ቻሉ፡፡ “ስራዬ ምንድን ነው ብዬ ስጠይቅ፤ ሰዎችን እንኳን ደህና መጣችሁ፤ እንደምን አመሻችሁ፤ ደህና አደራችሁ ማለት በተጨማሪም ፈገግታ መለገስ ነው አሉኝ፡፡ ለኔ እጅግ ቀላል ነበር ምክንያቱም ተዋናይት ነኛ፡፡ ሆኖም ለዚህ ስራ የማገኘው ክፍያ እጅግ የሚበዛ ስለመሰለኝ እንደአካባቢውን ማጽዳት እና መስኮቶቹን መወልወል መሰሉ ሌሎች ስራዎችንም እሰራ ነበር፡፡ እናም ሁሌም ስራህን ጠንክረህ ስትሰራ አንድ የሚያስተውልህ ሰው ይኖራል::” ይላሉ ዶ/ር መንበረ የኋሊት ሲያስታውሱ፡፡ እ.አ.አ. 2002 አ.ም. ይሰሩበት የነበረው ሆቴል በኪሳራ ምክንያት ለሽያጭ ሲቀርብ ለአመታት ጠንካራ ሰራተኛነታቸውን ያስተዋለው ጣሊያናዊ ደንበኛቸው “ገንዘብ ላበድርሽ ሆቴሉን ግዢውና ሰርተሽ ክፈይኝ” የሚል ጥያቄ ያቀረቡላቸው፡፡ ሳያወላውሉ ጥያቀውን ተቀበሉ፡፡ ብድሩንም በጣም በአጭር ጊዜ ለመመለስ ችለዋል፡፡ አሁን ዶ/ር መንበረ ለ13 አመታት ያህል የሳሉቴ ቪታ ሬስቶራንት ባለቤት ናቸው፡፡ በትንሿ የሴቶች መጠለያ ውስጥ የተወለደው ክርስቲያንም በኒውዮርክ ዩኒቨርሲቲ ዶክትሬቱን ለመያዝ እየተማረ ይገኛል፡፡

 

ህይወት በብዙ መልኩ የፈተነቻቸው ዶ/ር መንበረ በመከራዎች ውስጥ እንዳይሸነፉ የረዱዋቸውን ሰዎች በማሰብ አሁን ለአለም መልሰው እየሰጡ ነው፡፡ በአሜሪካውያውያኑ የምስጋና ቀን ወቅት በ2011 300፤ በ2012 600፤ በ2013 ደግሞ 900 ሰዎችን በሬስቶራንታቸው ጋብዘዋል፡፡ በአካባቢያቸው ያሉ ወጣት ሴቶችንም ለማገዝ ከፍተኛ አስተዋጽኦ ያደርጋሉ፡፡ ለብዙ ሴቶች አርአያ ለመሆንም ችለዋል፡፡ በሆሊ ኔምስ ዩኒቨርሲቲ የክብር ዶክትሬት ሲሰጣቸው የወቅቱ የዩኒቨርሲቲው ፕሬዝዳንት ዶ/ር ዊሊያም ሄንስ የዶ/ር መንበረን ታሪክ በአንዲት የጣሊያንኛ ምሳሌያዊ አነጋገር ገልጸውት ነበር፡፡ አኪ ቮሌ ና ማንካኖ ሞዲ ወይም በሀገርኛው ከልብ ካለቀሱ እንባ አይገድም፡፡

ምንጭ፡- studentethiopia

 

 



 

Related Topics